Երեք կարևոր հատկանիշ, որ կարող ենք սովորել շախմատիստներից

Շաբաթ օրն առիթ ունեցա կարճատև շփում ունենալ Հայաստանի անվանի շախտամատային մարզիչներից մեկի հետ: Մենք զրուցում էինք շախմատից, և հարգարժան մարզիչն աստիճանաբար իր խոսքը տարավ-հասցրեց դեպի այս մարզաձևի փիլիսոփակայան ակունքներ:

Ինքս սիրում ու խաղում եմ շախմատ (վերջին տարիներին ավելի շուտ՝ առցանց): Եվ, մարզիչի խոսքը լսելիս հասկացա, որ ուժեղ շախմատիստ դառնալու համար մարզվելը զուտ մեկնարկի սկզբն է: Տաղանդը նույնպես ցանկալի նախախայման է: Սակայն, դու պետք է նաև քո մեջ հասունացնես մի շարք կարևոր հատկանիշներ:

Զրուցակիցս ոգևորված ինձ ներկայացնում էր շախմատիսներին բնորոշ այդ հատկանիշները (որոնք իրականում 3-ը չեն, ուղղակի ես ֆիքսեցի այդ երեքը): Իսկ ես լսում ու մտածում էի՝ ինչքա՜ն սովորելու բան ունենք մենք՝ կայքատերերս ու բլոգերներս շախմատային իմաստասիրությունից (ով չգիտի՝ «իմաստասերը» նույն «փիլիսոփան» է՝ հայերեն):

1. Աշխատասիրություն

Լավ շախմատիստը չի կարող ջանասեր չլինել: Խոսքը զուտ ամենօրյա մարզումների մասին չէ: Շախմատիստները հաճախակի մասնակցում են տարբեր վարկանիշային մրցաշարերի, իսկ դրանց դեռ պատրաստվել է պետք: Պետք է նաև հետևել շախմատային աշխարհի անցուդարձին, մշակել նորանոր տակտիկական լուծումներ:

Այլ կերպ ասած՝ պետք է միշտ զբաղված լինել ու աշխատել է պետք:

Աշխատասիրությունը մեզ էլ չէր խանգարի, իհարկե, եթե ունենք լուրջ ձգտումներ, եթե բլոգինգը միայն հոբբի չէ, ու կայքն էլ չի բացվել որպես «պարապ վախտվա խաղալիք»:

2. Ժամանակի ճիշտ կառավարում

Զրուցակիցս պատմում էր, որ հերթական մրցաշարից առաջ Կասպարովն ինքն իրեն ստուգելու համար 1 րոպեի տևողությունը կանխազգալու թեսթի էր դիմում: Եվ, երբ վայրկյանաչափով ֆիքսվում էր մի քանի վայրկյանի տարբերություն, Կասպարովը մտահոգվում էր՝ «չէ, վիճակս լավ չէ, ես 3 վայրկյանով սխալվեցի…»:

Ժամանակի զգացողությունն ու ճիշտ կառավարումը խիստ կարևոր հատկանիշներն են, որոնք, ցավոք, հաճախ անտեսվում են մեր կողմից: Երբեմն կարող ես գիշերդ լուսացնել համակարգչիդ դիմաց, ժամերով քեզ զրկել ամեն ինչից, «կպնել ու չպոկվել» ինչ-որ մի հիմար մանրուքից:

Մենք հաճախ չենք հարգում ու չենք գնահատում մեր ժամանակը՝ կարևոր գործերին հատկացնելով վայրկյաններ, իսկ մանրուքների վրա ժամեր վատնելով:

3. Անհաջողության խելամիտ հաղթարարում

Զրուցակիցս խիստ կարևորեց շախմատիստի կողմից արժանավայել պարտվելու ու իր պարտություններից դասեր քաղելու հատկանիշը: «Շախմատիստը ստիպված է տարվա մեջ մի շարք մրցաշարերի մասնակցել, ու նրան բախտ չի վիճակվում միշտ հաղթող դառնալ: Պատկերացնո՞ւմ եք, եթե ամեն պարտությունից հետո նա ընկճվի ու հիասթափվի…»

Հրաշք-խոսքեր են: Հաղթանակին ձգտողը պետք է պատրաստ լինի անհաջողություններին ու պարտություններին: Դասեր քաղի և այդ իրավիճակից դուրս գա ավելի տոկունացած ու փորձված:

Կյանքը հաջողությունների ու անհաջողությունների շղթա է: Ցանկանո՞ւմ ես հաղթել, ուրեմն հիշիր ու վերլուծիր անցյալի պարտություններդ:

Աղբյուրը՝ e-armenians.com

Պիտակներ. ժամանակի կառավարում, շախմատ