Բլոգերներին հատուկ շեղումների 6 ձեւերը

Բլոգերները նման չեն մյուս մարդկանց: Իհարկե, ինչպես բոլորը, բլոգերները նույնպես ունեն առօրյա անձնական, ընտանեկան, աշխատանքային եւ հանրային գործեր ու հոգսեր: Բայց, որպես ակտիվ մարդիկ, բլոգերները նաեւ ստանձնել են լրացուցիչ պարտականություններ՝ կապված բլոգինգի եւ շփումներ հաստատելու հետ:

Եվ այնպես է պատահում, որ բլոգինգը բլոգերի համար դառնում է ոչ թե լրացուցիչ, այլ՝ հիմնական գործ: Եվ առաջ են գալիս տարբեր շեղումներ (չգիտեմ էլ՝ չակերտով գրե՞լ այս վերջին բառը, թե՞ առանց չակերտ):

Բլոգերը սկսում է ավելի ու ավելի շատ ժամանակ հատկացնել իր վեբ-կյանքին եւ օր-օրի ինտերնետ մտնելն ավելի ու ավելի է պայմանավորված լինում իր բլոգով: Նա այժմ ինտերնետ է մտնում հիմնականում իր բլոգի համար՝ նոր մտքեր, նյութեր ու համակիրներ ձեռք բերելու, նաեւ իր ստեղծած նյութերը համացանցում տարածելու:

Իրենց բլոգն առաջ մղելու եւ քարոզելու այս ընթացքում, բլոգերների մի մասը սկսում է միակողմանի շեղվել եւ կարեւորել կոնկրետ մի ոլորտ:

• «Դիզայնամոլները» սկսում են ավելի ու ավելի մեծ ուշադրություն հատկացնել իրենց բլոգի դիզայնին, եւ կայքի գերազանց ձեւավորվումը դառնում է նրանց թիվ մեկ խնդիրը (ես կասեի նաեւ՝ գլխացավանքը): Նրանք հաճախ մոռացության են մատնում այն իրողությունը, որ մարդիկ իրենց կայք մտնում են ոչ թե դիզայնի, այլ՝ բովանդակության համար:
• «Պլագինամոլները» փորձում են իրենց բլոգի հաջողությունը եւ որակը կապել «զարմանահրաշ» պլագինների հետ: Սակայն նրանք մոռանում են, որ պլագինների առատությունը ծանրացնում եւ խոցելի է դարձնում իրենց կայքը: Միեւնույն ժամանակ, նրանք անտեսում են այն պարզ սկզբունքը, որ ընթերցողին որքան ավելի շատ բան տրամադրես, այդքան ավելի քիչ տեղեկատվություն նա կյուրացնի:
• «SEO-ամոլները» իրենց բլոգի բովանդակությունից շեղվում են եւ ձեռք բերում այդ բովանդակությունը գուգլում բարձր տողեր հասցնելու մոլուցք: Նրանք մոռանում են, որ SEO-ն նախ եւ առաջ գուգլից օգտվող մարդիկ են:
• «Ֆեյսբուքամոլները» եւ մյուս ցանցերին «տրված» բլոգերներն իրենց հաջողությունը «որոնում են» սոցիալական ցանցերում: Նրանք ավելի շատ ժամանակ են հատկացնում ցանցերին, քան իրենց բուն բլոգին:
• «Գովազդամոլները» իրենց բլոգը դարձնում են գովազդային մեծ հարթակ, որտեղ կայքի հետ որեւէ կապ չունեցող գովազդային տեքստերն ու բաններները սկսում են դառնալ գերիշխող, իսկ կայքի բուն բովանդակությունը դառնում է պարզապես «գովազդը լրացնող»:
• Վերջապես, «ստատիստիկամոլները» իրենց բան ու գործը թողած, ընկնում են թվերի ետեւից: Նրանց ավելի շատ սկսում է հետաքրքրել Google RageRank-ը, Яндекс тИЦ-ը եւ տրաֆիկը, քան՝ բլոգի օգտակարությունը եւ որակը: Բարձր թվերի ետեւից ընկնողների մի մասը սկսում է «բացը» լրացնել կեղծ տրաֆիկով եւ «սեւ» հնարքներով (չգիտեմ էլ, թե ում եւ ինչ են ցանկանում ապացուցել այս մարդիկ):

Ամփոփման փոխարեն

Հավատացեք ինձ, որ ամեն մի «մոլությունից» եւ մոլորությունից ձերբազատվելը հեշտ չէ: Եվ ինչպես բոլոր բնագավառներում, բլոգինգի մեջ նույնպես առաջնահերթությունը պետք է տրվի հավասարակշռությանը եւ նպատակասլացությանը:

Պետք է լինել եւ մնալ հավասարակշռված, չշեղվել եւ որպես թիվ մեկ խնդիր չընտրել միայն մեկ ուղղությունը:

Պետք է նաեւ հիշել, որ ամենակարեւոր հարցը բլոգի օգտակարությունն է եւ օգտագործելիությունը:

Այլ կերպ ասած, առաջնայինը բլոգի բովանդակությունն ու որակն է, եւ ոչ թե հարակից գործերը:

Աղբյուրը՝ e-armenians.com

Պիտակներ. բլոգ, բլոգեր, բլոգինգ, բլոգրառում