Ի՞նչ անել ամանորյա տոներից հետո…

Այսօր 2012-ի իններորդ օրն է: Տարվա 2.5 տոկոսն արդեն դարձավ պատմություն: Անցյալի մեջ անհետացան ամանորյա շնորհավորանքները, և, հուսամ, որ բարի մաղթանքները կմնան ու կօգնեն մեզ 2012-ի ողջ ընթացքում:

Մեզ սպասվում է փոփոխություններով ու նորություններով լի սև, ջրային վիշապի տարի: Ասում են, որ 2012-ը համարձակ, ուժեղ ու նպատակասլաց մարդկանց տարի է, որտեղ ալարկոտությամբ, թուլությամբ ու կամազրկությամբ դժվար թե հնարավոր լինի ինչ-որ հաջողության հասնել (թեև, իմ կարծիքով, միշտ էլ այդպես է եղել):

Ասում են նաև, որ 2012-ը բացահայտումների լի տարի է:

Ի՞նչ եմ առաջարկում: Եթե բացահայտումներով լի տարի է, եկեք սկսենք ինքներս մեզնից ու բացահայտենք ինքներս մեզ:

Բացեք ձեր կայքը և սուր ու անողոք քննադատի աչքերով մանրակրկիտ զննեք ու բացահայտեք ձեր կայքում առկա թերությունները:

Դժվարանո՞ւմ եք. ահա հարցաշար, որը կօգնի ձեզ՝ հասկանալու ներկան և նախապատրաստվելու ապագային:

Եթե այս հարցերը ժամանակ են պահանջում, ապա մի զլացեք ու մի քանի նոր գրառում կատարելու փոխարեն լրջորեն զբաղվեք կայքը կատարելագործելով:

Մոտակա (անհետաձգելի) գործերի ցանկ

Սկսում ենք գաղափարից կամ իդեայից:

• Հասկացեք, թե ինչու եք բացել ձեր կայքը: Նպատա՞կը: Ի՞նչ խնդիրներ եք ցանկանում լուծել:
• Ես գիտեմ, որ շատերդ այս հարցի վրայից պարզապես «կթռնեք»: Ուստի կրկնեմ մեկ անգամ ևս. ինչո՞ւ եք բացել ձեր կայքը: Վերցրեք թուղթ ու գրիչ, ու գրեք «որպեսզի… 1) …2)… »:
• Հուսամ, որ գրել եք, այլ ոչ թե ձեր մտքում եք ինչ-որ անավարտ մտքեր «խզմզել»: Հիմա ձեր դիմացը պահեք ձեր իսկ գրած մտքերը ու բացեք ձեր կայքը: Բացեք ու սկսեք զննել «ոտից-գլուխ»: Ոչ թե հպանցիկ (հասկանալի է, որ դուք անգիր գիտեք ձեր էջի ամեն մանրուքը), այլ՝ գնահատող աչքերով զննեք: Զննեք ձևավորումը, նկարները, գույները, մենյուն, sidebar-ները, պլագինները, բաններներն ու էլ չգիտեմ ինչ-երը, կարդացեք ձեր գրառումների վերնագրերը, բացեք ու վերընթերցեք ձեր գրառումներից մի քանիսը… Ու տեսեք, թե այն, ինչի համար ստեղծել եք ձեր կայքը, համապատասխանո՞ւմ է արդյոք նրան, ինչ ունեք այս պահին:
• Գտա՞ք թերություններ՝ շատ լավ: Գրի առեք նաև ձեր նկատած բոլոր թերությունները: Հիշողություններիդ վրա հույս մի դրեք, գրի՛ առեք: Չե՞ք գտել և ոչ մի թերություն (ա՜յ քեզ սուտ…), ուրեմն դիմեք ձեր մտերիմներին ու ընթերցողներին:
• Չմոռանամ ասել. նախորդ կետով ուշադրություն դարձրեք ամեն-ամեն մանրուքին: Եվ ամեն մանրուքի վրա կանգ առեք ու հարցրեք ինքներդ ձեզ. ինչքանո՞վ է այն նպաստում կայքի հետ կապված ձեր նպատակների ու խնդիրների իրագործմանը:

Անցնում ենք բովանդակային մասին:

• Եկեք անկեղծանանք. դուք գո՞հ եք ձեր ստեղծած նյութերից: Մի շտապեք «այո» ասել: Հիշեք, որ դուք անողոք քննադատ եք և ոչ թե ինքնագովեստի կարոտ մի մարդ:
• Հաջորդ հարցս սա է՝ գո՞հ եք ձեր նյութերի մատուցման տարբերակից՝ մտքերի շարադրանք, գրառման որակ և այլն:
• Երրորդ հարցս թերևս ամենադժվարն է՝ համոզվա՞ծ եք, որ ձեր նյութերը հետաքրքիր ու օգտակար են: Չմոռանաք քննադատաբար պատասխանել այս հարցին:
• Վերջապես, նախագծեք այն քայլերը, որոնք կանեիք ֆեյսբուքն ու մյուս ցանցերը չլինելու պարագայում: Գտեք այլընտրանք. կյանքը ֆեյսբուքով չի սկսվել ու ոչ էլ դրանով է ավարտվում:

Ամփոփիչ կետեր:

• Մի՛ տարվեք հաշվիչներով ու թվերով, այլ կենտրոնացեք ձեր նպատակների վրա:
• Ընկերացեք ձեր կայքի այցելուների հետ:
• Ընկերացեք գուգլի հետ:
• Ամեն օր մի նոր բան սովորեք:
• Հիշեք, որ առողջությունից թանկ բան աշխարհում չկա:

Խնդրում ու հորդորում եմ: Հարցերին պատասխանեք ոչ թե բանավոր, այլ՝ կատարեք նշումներ: Եվ, ամեն նոր գրառում ստեղծելուց առաջ նախ ստուգեք, թե ի՞նչ եք արել և ի՞նչն է մնացել անավարտ: Ու, հավատացեք ինձ, որ այս հարցերին օր առաջ պատասխանելն ավելի տեղին ու ճիշտ է, քան օրական 366 գրառում կատարելը:

Աղբյուրը՝ e-armenians.com

Պիտակներ. կայքէջի օպտիմալացում, վեբ կայք

Հեղինակի մասին
Ողջույն, ես այս բլոգի հեղինակն եմ: Ուրախ կլինեմ, եթե դուք բաժանորդագրվեք բլոգի գրառումներին և ընթերցեք իմ էլ. գրքերը:
Մեր բլոգում Artur-ը գրել է 583 հոդված: