Ինչո՞ւ և ինչպե՞ս զեկուցել Գուգլին, եթե ձեր հոդվածները գողացել են

Շատերդ երևի գլխի եք ընկել, թե ինչու եմ գրում այս արտահերթ հոդվածը: Արտահերթ է, որովհետև բլոգում սովորաբար երկուշաբթի, չորեքշաբթի և ուրբաթ օրերին են նոր նյութեր ավելացվում:

Բայց ես ստիպված եմ մի կողմ թողնել իմ առօրյա գործերն ու գրել, քանի որ մեր իրականությունում հայտնվել է հերթական մոլախոտը: Եթե խնդիրը միայն այս մոլախոտը լիներ, հարցը հեշտ կլուծվեր: Խնդիրը երևույթն է, ու այդ երևույթը կրող անձի, թող անհամեստ չհնչի, պադոշության աստիճանը:

Ուստի, ես չեմ զլանա, կգրեմ, որն ինձնից կտանի մեկ-երկու ժամ: Սակայն բոլորիցդ հոգաչափ կխնդրեմ. տրամադրել մինչև 10 րոպե և զեկուցել Գուգլին այն մասին, որ ձեր նյութերը գողանում են:

Այսօր գլխիկավոր խմբագիրն է խնդիրը, վաղը կարող է դառնալ գլխիկավոր մեկ այլ մակաբույծ (պարազիտ): Ուստի, որպես հակաճիճվային միջոց, առաջարկում եմ ծանոթանալ Գուգլին զեկուցելու այս պարզ, բայց կարևոր հնարավորության մասին:

Կրկին և նորից. եթե ձեր հեղինակային իրավունքները հարգում եք, տրամադրեք մի 10 րոպե՝ այս նյութին ծանոթանալու, ու ևս 10 րոպե՝ Գուգլին զեկուցելու համար:

Նյութը դյուրին դարձնելու համար այն կշարադրեմ որպես հարց ու պատասխան:

Հարց #1. Ինչո՞ւ զեկուցել

Ամենատրամաբանական պատասխանն է՝ որպեսզի գրագողը պատժվի:

Ինչպե՞ս:

Եթե Գուգլը համոզվեց, որ ձեր ներկայացրած տվյալները համապատասխանում են իրականությանը, ապա արտագրող էջերը կհեռացվեն գուգլի ինդեքսացիայից:

Սա էլ է պատժի ձև, երբ գրագող կայքը կամ դրա էջերն անհետանում են գուգլից:

Հարց #2. Ինչի՞ց սկսել

Պարզապես այցելեք այս էջը:

Ովքեր անգլերենից լավ չեն, ես կբացատրեմ նաև այդ էջում տեղադրված դաշտերի լրացման ձևը: Կրկնեմ՝ այս ամբողջը տևելու է ոչ ավելի, քան 5-10 րոպե՝ կախված այն հանգամանքից, թե քանի հոդված կամ նյութ են ձեզանից գողացել:

Իմ պարագայում, գլխիկավոր խմբագիրն այս պահի դրությամբ արտատպել է 9 հոդված, ու բոլոր էջերը զեկուցելը տևեց 2-3 րոպե:

Հարց #3. Ինչպե՞ս լրացնել դաշտերը

Սկսենք ամենավերին դաշտերից:

1. Կոնտակտային տվյալներ

Հերթականությամբ լրացրեք ձեր՝

• Անունը
• Ազգանունը
• Կազմակերպության անունը
• Ո՞վ է զեկուցողը (Self` ինքս)
• Ձեր Email-ը
• Ձեր երկիրը

2. Տեղեկատվություն գողացված էջերի մասին

Այստեղ պարզապես լրացնում եք հետևյալ երեք դաշտերը.

• Նախաբան-նկարագիր (Identify and describe the copyrighted work)
• Օրիգինալ (ձեր) էջի հղումը (Where can we see an authorized example of the work?)
• Այն (գողացող) էջի հղումը, որտեղ հայտնվել է ձեր նյութը (Location of infringing material)

Առաջին կետում ես գրել եմ հետևյալը՝

My entire article “Հոդվածի վերնագիր” can be viewed at the URL below

Կախված նրանից, թե ինչ հոդվածի մասին եք զեկուցում, փոփոխեք “Հոդվածի վերնագիրը” և գրեք ձերը:

Ահա օրինակ:

Առաջին դաշտում գրել եմ (անգլերեն), որ իմ «Սոցիալական ցանցերի մասին ամենավտանգավոր միֆը» հոդվածն ամբողջովին դարձել է գրագողության թիրախ:

2-րդ դաշտում նշել եմ այդ հոդվածի օրիգինալ հղումը՝ http://www.e-armenians.com/social-media/myth-social-media/

Իսկ 3-րդ դաշտում՝ գրագող էջի հղումը՝ http://blognews.am/arm/news/514/socialakan-canceri-masin-amenavtangavor-mify.html

Այս երեք տվյալները պետք է Գուգլի աշխատակիցներին, որպեսզի կատարեն համեմատություն և հաստատեն/ժխտեն քո բողոքը:

Հարց #4. Ինչպե՞ս զեկուցել մեկից ավելի հղումների մասին

Մեկ ցիկլով դուք կարող եք բողոքարկել ոչ ավելի, քանի 10 էջերի մասին:

Ամեն նոր էջի մասին զեկուցելու համար սեղմեք Add a new group հղումը, ու շարունակեք վերևում նկարագրված երեք դաշտերը լրացնելը:

Հարց #5. Ու, վե՞րջ

Համարյա:

Ձեզ մնում է միայն համաձայնվել որոշ պայմանների հետ (այն, որ դուք եք հեղինակը և ձեր տրամադրած տվյալները ճիշտ են): Վերջում՝ բողոքարկելու Ամիս/Ամսաթիվ/Տարի ու ձեր անուն-ազգանունը:

Եվ, ամենա-ամենավերջում՝ captcha-ծածկագիր ու Submit:

Եթե ամեն ինչ ճիշտ եք կատարել, Sumbit-ից հետո կտեսնեք հետևյալ հաղորդագրությունը:

Հարց #6. Ինչպե՞ս զեկուցել ավելի, քան 10 էջի մասին

Հոգ չէ, կրկնեք բոլոր քայլերը՝ հաջորդ 10 հղումների համար:

Հարց #7. Ինչպե՞ս հսկել բողոքարկման ընթացքը

Զեկուցելուց հետո, պարզապես այցելեք Removal Dashboard էջը:

Այսքանը:

Ակնկալում եմ ակտիվ զեկուցումներ: Եվ, իհարկե, մեկնաբանություններ:

Աղբյուրը՝ e-armenians.com

Հեղինակի մասին
Ողջույն, ես այս բլոգի հեղինակն եմ: Ուրախ կլինեմ, եթե դուք բաժանորդագրվեք բլոգի գրառումներին եւ ընթերցեք իմ էլ. գիրքը:
Մեր բլոգում Artur-ը գրել է 544 հոդված: